Նորություններ և միջոցառումներ

Նորություններ և միջոցառումներ

CONNECT  նախագծի կոնսորցիումի անդամների այցը Վանաձորի Հ. Թումանյանի անվան պետական համալսարան

            Ս/թ նոյեմբերի 10-ին Էրազմուս+ ԿԶԲԿ «Համալսարան-արդյունաբերություն» կապի հաստատումը Մոլդովայի, Վրաստանի և Հայաստանի ուսանողների խելամիտ ձեռներեցային համագործակցության և մրցունակության միջոցով» (CONNECT)  նախագծի կոնսորցիումի համալսարանների ներկայացուցիչներն այցելեցին Վանաձորի պետահական համալսարան։

Հյուրերը ներկայացնում էին ծրագրային երկրների հաստատությունները (Ֆինլանդիա, Ռումինիա, Լատվիա և Բուլղարիա) և գործընկեր համալսարանների հաստատությունները (Մոլդովա, Վրաստան և Հայաստան)։

Այցի նպատակն էր ծանոթանալ Վանաձորի Հ. Թումանյանի անվան պետական համալսարանի ենթակառուցվածքին, ձեռնարկատիրական գործունեությանն ուղղված ռազմավարական ուղղություններին, նախագծի շրջանակներում նախատեսվող SMART ձեռնարկատիրական կենտրոնի տեղակայման, համալսարանի և այլ կազմակերպությունների հետ կապի և հետագա համագործակցության պլանավորման մասին։

ՎՊՀ ռեկտոր, դոկտոր, պրոֆեսոր Ռ. Սահակյանը ողջունեց հյուրերին՝ կարևորելով ՎՊՀ-ի ներգրավվածությունը նախագծում և նշելով, որ համալսարանի և ձեռնարկատիրական կազմակերպությունների միջև սերտ համագործակցությունը մարզի տնտեսության կայունության գրավականն է։

Ռեկտորի ողջույնից հետո Լապեենրանտայի տեխնոլոգիական համալսարանի (Ֆինլանդիա) աշխատակցուհի Անաստասիա Չակիրը համալսարանի պրոֆեսորադասախոսական կազմի համար անցկացրեց նորարարական դասավանդման մեթոդներին վերաբերող Ապագա դասավանդման ձևավորումը. թվային հարցման և փախուստի սենյակի ստեղծում խորագրով սեմինար։

Անդամներն այցելեցին նաև Վանաձորի տեխնոլոգիական կենտրոն, ծանոթացան ՎՏԿ-ի գործունեության հիմնական ուղղություններին, այնտեղ տեղակայված կազմակերպություններին, նրանց գործունեությանը և հետագա հեռանկարներին։

Ծրագրի ընդհանուր նպատակներից է համալսարան-տնտեսություն կապի ամրապնդումը՝ հիմնված Արևելյան գործընկերության բուհերի խելացի (հարմարեցված) ձեռնարկատիրական մոտեցման վրա, ինչպես նաև ուսանողների և շրջանավարտների մրցակցային ուսումնասիրության (վարք, հմտություններ, մտածելակերպ) և աշխատատեղեր ստեղծելու կարողության զարգացումը http://connecterasmus.com/։

Էրազմուս+ ծրագրի CONNECT նախագծի շրջանակներում իրականացված առցանց վերապատրաստում

Էրազմուս+ «Համալսարան-տնտեսություն կապի հաստատումը Մոլդովայի, Վրաստանի և Հայաստանի ուսանողների խելամիտ ձեռներեցային համագործակցության և մրցունակության միջոցով» (CONNECT) նախագծի շրջանակներում 2021թ. հունիսի 14-ից հուլիսի 2-ը կոնսորցիումի գործըներկեր Լապեենրանտայի տեխնոլոգիական համալսարանը (Ֆինլանդիա) անցկացրեց առցանց վերապատրաստում «Թվային ուսուցումը համալսարանում» խորագրով։

ՎՊՀ-ից դասընթացին մասնակցեցին տարբեր ամբիոնների 14 աշխատակիցներ, որոնք բավականին մեծ աշխուժություն և հետաքրքրություն ցուցաբերեցին նորարարական դասավանդման և ուսումնառության մոտեցումներին։

Դասընթացը գլխավորապես վերաբերում էր թվային ուսուցման հիմնական գաղափարներին (առցանց ուսուցում, խառնուսուցում (հիբրիդային ուսուցում), ինքնուսուցում և այլն), ժամանակակից առցանց ուսուցման հիմնական տարրերին (տեսանյութեր, քննարկումներ, հարցաշարեր)։ Դասընթացը հնարավորություն տվեց մասնակիցներին մանրամասնորեն ծանոթանալու առցանց դասընթաց ստեղծելու մեթոդաբանությանը, տվյալների վերլուծությանը, հեղինակային իրավունքին վերաբերող խնդիրներին, առցանց լսարանում փոխներգործուն մեթոդներին (անվճար և վճարովի գործիքներ), դասընթացի կառավարման խնդիրներին։

Դասընթացի ավարտից հետո` հուլիսի 9-ին, CONNECT նախագծի տեղային համակարգող, միջազգային կապերի և դրամաշնորհների խթանման մասնագետ Գոհար Դոխոլյանը կարզմակերպել էր հանդիպում վերապատրաստման մասնակիցների հետ՝ քննարկելու աշխատակիցների տպավորությունները, վեր հանելու վերապատրաստման շնորհիվ ձեռք բերած հմտությունները և հասկանալու, թե ինչպես կարելի է կիրառել ձեռք բերած գիտելիքներն ու հմտությունները գործնականում։ 

Հանդիպմանը ներկայացվեց նաև ՎՊՀ-ի կողմից պատրաստված CONNECT նախագծի ծալաթերթը։