ՎՊՀ շրջանավարտների ստեղծագործական աշխատանքների ցուցահանդեսը Վանաձորի կերպարվեստի թանգարանում
Հունիսի 3-ին Վանաձորի Կառլոս Աբովյանի անվան կերպարվեստի թանգարանում տեղի ունեցավ <<Երիտասարդ հայացք>> խորագիրը կրող ցուցահանդեսը, որտեղ ներկայացված էին տարբեր տարիների շրջանավրտների դիպլոմային աշխատանքերը։
Նախագիծը կազմակերպվել է ՎՊՀ և ՎԿԹ համագործակցության շրջանակում և նպատակ ունի ավելի ընդլայնելու և բազմազան դարձնելու կրթական և մշակութային ոլորտների փոխգործունեությունը:
Բացման խոսքով հանեդես եկավ համալսարանի հասարակական գիտությունների ֆակուլտետի դեկան տ․գ․թ․ դոցենտ Հրայր Պապոյանը։
Ողջույնի խոսքով հանդես եկավ նաև գեղանկարիչ, Հայաստանի նկարիչների միության անդամ Փափագ Ալոյանը , ով բարձր գնահատեց ուսանողների ներկայացրած աշխատանքները և ընդգծեց նման ցուցահանդեսների կարևորությունը երիտասարդ արվեստագետների ստեղծագործական առաջընթացի համար։
Միջոցառման ընթացքում ելույթ ունեցավ նաև ՎՊՀ արվեստի և սպորտի ամբիոնի ավագ դասախոս Վահան Շահբազյանը՝ անդրադառնալով արվեստի կրթության նշանակությանը և ուսանողների ստեղծագործական ներուժի զարգացման հնարավորություններին։
Ամփոփիչ խոսքով ելույթ ունեցավ ՀՀ վաստակավոր նկարիչ, ՀՀ ժողովրդական նկարիչ, ՅՈՒՆԵՍԿՕ-ի նկարիչների միջազգային ասոցիացիայի Հայաստանի նկարիչների միության վարչության անդամ Անատոլի Ավետյանը։ Անատոլի Ավետյանը բարձր գնահատեց ուսանողների և դասախոսների ջանքերը և մաղթեց նորանոր բարձունքներ։
Հանդիսավոր մասից հետո ներկաները շրջեցին ցուցասրահում, ծանոթացան ներկայացված աշխատանքներին, որոնք առանձնանում էին թեմատիկ և ժանրային բազմազանությամբ, ստեղծագործական ինքնատիպ լուծումներով և գեղարվեստական հետաքրքիր մոտեցումներով։
Ցուցահանդեսը ևս մեկ անգամ ընդգծեց կրթական և մշակութային կառույցների համագործակցության կարևորությունը՝ նպաստելով երիտասարդ ստեղծագործողների բացահայտմանը և արվեստի հանրայնացմանը։
