Մարզերի դպրոցներում մեկնարկել են մասնագիտական կողմնորոշման հանդիպումները
2026 թ․ ապրիլի 2-ին Վանաձորի պետական համալսարանի ռեկտոր, մ․գ․դ․ Արմեն Ծատուրյանը, մանկավարժության և հոգեբանության ամբիոնի վարիչ, մ․գ․թ․, դոցենտ Լիլիթ Բաղդասարյանը և կարիերայի աջակցման և շարունակական կրթության մասնագետ Աիդա Իսկանդարյանը համագործակցության շրջանակներում այցելեցին Ստեփանավանի և Տաշիրի ավագ դպրոցներ։ Աշխատանքային խումբը հանդիպեց 10-12-րդ դասարանների 250 և ավելի աշակերտների հետ, հանդիպմանը մասնակցեցին նաև Ստեփանավանի թիվ 6 միջնակարգ դպրոցի աշակերտները։
Ապրիլի 8-ին նույն ձևաչափով մասնագիտական կողմնորոշման հանդիպում անցկացվեց Սպիտակի ավագ դպրոցում, իսկ ապրիլի 9-ին ռեկտորը և քիմիայի և կենսաբանության ամբիոնի ֆ․մ․գ․թ․, դոցենտ Սմբատ Փարսադանյանն այցելեցին Նոյեմբերյանի ավագ դպրոց։
Հատկանշական է, որ այս գործընթացին անձամբ մասնակցում և հանդիպումները ղեկավարում է համալսարանի ռեկտոր Արմեն Ծատուրյանը։ Նոր մոտեցումն էապես բարձրացնում է հանդիպումների արդյունավետությունն ու անմիջականությունը, ընդլայնում է համագործակցության աշխարհագրությունը։
Հանդիպումների ընթացքում հիմնական շեշտը դրվեց 2026–2027 ուստարվա դուալ մասնագիտությունների վրա։ Ռեկտորը հանգամանորեն ներկայացրեց «Մաթեմատիկա-ֆիզիկա» և «Կենսաբանություն-քիմիա» դուալ կրթական ծրագրերն իրենց որակավորումներով և առավելություններով։ Նա մանրամասն ներկայացրեց ուսանողների համար նախատեսված էլեկտրոնային քննությունների գործընթացը, զեղչերի ճկուն համակարգը, ուսումնական լաբորատորիաները, միջազգային շարժունության ծրագրերը և այլն։
Աշակերտների շրջանում նկատվեց մեծ հետաքրքրություն, հատկապես, դուալ կրթության և բուհում ներդրված տեխնոլոգիական նորամուծությունների նկատմամբ։ Մասնագետների հետ անմիջական հաղորդակցությունը հնարավորություն տվեց դպրոցականներին ստանալու իրենց հուզող հարցերի պատասխանները և պատկերացում կազմելու ապագա մասնագիտական ուղու վերաբերյալ։
