Կրթությունը՝ որպես ապագա կերտելու հնարավորություն․ հանդիպում «Դասավանդիր հանուն Հայաստանի» կրթական հիմնադրամի ներկայացուցիչների հետ
Նոյեմբերի 27-ին Վանաձորի Հ․ Թումանյանի անվան պետական համալսարանում «Դասավանդիր հանուն Հայաստանի» կրթական հիմնադրամի ներկայացուցիչները հանդիպեցին ավարտական կուրսերի ուսանողների հետ՝ ներկայացնելով ծրագրի առաքելությունը, մասնակցության պայմաններն ու կրթության ոլորտում մասնագիտական գործունեություն ծավալելու հնարավորությունները։ Հանդիպումը կազմակերպվել էր ՎՊՀ կրթական բարեփոխումների, շարունակական կրթության և կարիերայի կենտրոնի կողմից։
Ուսուցչի մասնագիտությունը՝ ավելին, քան աշխատանք
Հիմնադրամի կարիերայի զարգացման համակարգող Սրբուհի Գուլանյանը ներկայացրեց ծրագրի գաղափարախոսությունն ու հիմնական նպատակները՝ կարևորելով որակյալ կրթության հասանելիությունը և կրթության դերը համայնքների զարգացման գործում։
Հատկապես ընդգծվեց հեռավոր և սահմանամերձ գյուղերի երեխաների կրթական հնարավորությունների ընդլայնման նշանակությունը։ Նման համայնքներում ուսուցչի աշխատանքը կարող է վճռորոշ դեր ունենալ երեխաների գիտելիքների, ինքնավստահության և ապագայի հնարավորությունների ձևավորման գործում։ Ուսուցիչը ոչ միայն գիտելիք փոխանցող է, այլև մարդ, որը կարող է ոգեշնչել, բացահայտել սովորողների ներուժը և օգնել նրանց հավատալ սեփական ուժերին։
Ծրագրի ուսուցիչ-առաջնորդներ Ալեքսան Խառատյանը (ՎՊՀ շրջանավարտ), Ռուզաննա Յարիբեկյանը, ինչպես նաև շրջանավարտ-դեսպան Հրայր Այվազյանը ուսանողների հետ կիսվեցին իրենց փորձով՝ պատմելով ծրագրին դիմելու և մասնագիտական ճանապարհի ընթացքում հանդիպած հնարավորությունների ու դժվարությունների մասին։
Նրանց պատմություններում առանձնահատուկ տեղ էր զբաղեցնում այն գիտակցումը, որ կրթական աշխատանքը կարող է իմաստավորել մասնագիտական գործունեությունը՝ հնարավորություն տալով սեփական գիտելիքներն ու հմտություններն ուղղելու երեխաների զարգացմանը։
Մասնագիտական զարգացում և նոր հեռանկարներ
Հանդիպման ընթացքում անդրադարձ կատարվեց նաև աշխատանքային կայունության և մասնագիտական ինքնուրույնության կարևորությանը։ Մասնակիցները խոսեցին այն մասին, թե որքան կարևոր է ունենալ աշխատանք, ապահովել ֆինանսական անկախություն և միաժամանակ զբաղվել սիրելի ու հետաքրքիր գործով, որը հնարավորություն է տալիս զարգանալու և զգալու սեփական աշխատանքի արժեքը։
Նրանք ընդգծեցին, որ «Դասավանդիր հանուն Հայաստանի» ծրագրին մասնակցությունը կարող է դառնալ ոչ միայն ուսուցչական գործունեություն սկսելու, այլև նոր կարողություններ ձեռք բերելու և հետագա մասնագիտական ուղին ընդլայնելու հնարավորություն։
Հնարավորություններն ու մարտահրավերները՝ մասնակիցների փորձով
Քննարկվեց փոփոխվող պայմաններում ճկուն լինելու, պատասխանատվություն ստանձնելու և ստեղծագործ լուծումներ գտնելու անհրաժեշտությունը։ Մասնակիցների անձնական փորձը հնարավորություն տվեց ուսանողներին ավելի իրատեսական պատկերացում կազմելու ծրագրի մասին՝ տեսնելով ոչ միայն դրա ընձեռած հնարավորությունները, այլև այն ջանքերն ու պատրաստակամությունը, որոնք անհրաժեշտ են կրթական ոլորտում հաջողելու համար։
Վանաձորի Հ․ Թումանյանի անվան պետական համալսարանը կարևորում է ուսանողների մասնագիտական կողմնորոշմանն ու զարգացմանը նպաստող նախաձեռնությունները, ինչպես նաև կրթական կազմակերպությունների և գործատուների հետ համագործակցությունը։
