Գիտական երկխոսություն՝ առանց սահմանների. VIII միջազգային գիտաժողովը ՎՊՀ-ում
Հոկտեմբերի 16-ին Վանաձորի Հ. Թումանյանի անվան պետական համալսարանը դարձավ միջազգային գիտական երկխոսության հարթակ՝ համախմբելով Հայաստանի և արտերկրի գիտնականներին, հետազոտողներին ու ակադեմիական հանրության ներկայացուցիչներին։ ՎՊՀ օտար լեզուների և գրականության ամբիոնի նախաձեռնությամբ անցկացվեց «Լեզուն և գրականությունը միջմշակութային հաղորդակցության համատեքստում» խորագրով VIII միջազգային գիտաժողովը։
Տարիների ընթացքում ձևավորված գիտական այս նախաձեռնությունը ևս մեկ հնարավորություն ընձեռեց տարբեր երկրների հետազոտողներին ներկայացնելու իրենց ուսումնասիրությունների արդյունքները, քննարկելու ժամանակակից բանասիրության արդիական հիմնախնդիրները և ընդլայնելու միջհամալսարանական գիտական համագործակցության շրջանակները։
Գիտաժողովի միջազգային ընդգրկումն արտացոլվեց մասնակիցների աշխարհագրությամբ. ՎՊՀ գործընկերների շարքում էին Ռուսաստանի, Բելառուսի, Հունգարիայի, Վրաստանի, Լեհաստանի և Սերբիայի ութ բարձրագույն ուսումնական հաստատությունների ներկայացուցիչներ։ Գիտական տարբեր դպրոցների և հետազոտական ավանդույթների հանդիպումը հնարավորություն տվեց քննարկվող հարցերը դիտարկելու բազմակողմանի մոտեցումներով՝ ազգային մշակութային առանձնահատկություններից մինչև լեզվական ու գրական համընդհանուր օրինաչափություններ։
Գիտաժողովի բացմանը ողջույնի խոսքով հանդես եկան ՎՊՀ ռեկտոր, մանկավարժական գիտությունների դոկտոր Արմեն Ծատուրյանը, հումանիտար գիտությունների ֆակուլտետի դեկան, պ.գ.թ., դոցենտ Մարիյա Բրուտյանը և օտար լեզուների և գրականության ամբիոնի վարիչ, բ.գ.թ., դոցենտ Լուսիկ Վարդանյանը։
Գիտական քննարկումների մեկնարկը տրվեց լիագումար նիստում, որի զեկուցումներն առանձնացան գրական երևույթների մեկնաբանման բազմազանությամբ և պատմամշակութային համատեքստերի ընդգրկմամբ։
Նովոսիբիրսկի պետական համալսարանի պրոֆեսոր, բանասիրական գիտությունների դոկտոր Օլգա Ժուրավելն անդրադարձավ դիվաբանական առասպելի արտացոլմանը XX դարի ռուս գրականության հիշողության մեջ՝ ուշադրության կենտրոնում պահելով առասպելի և գրական հիշողության փոխառնչությունները։
ՎՊՀ օտար լեզուների և գրականության ամբիոնի դոցենտ, բ.գ.թ. Թադևոս Թադևոսյանի զեկուցումը նվիրված էր ՁորաՀԷԿ-ի՝ որպես արդյունաբերական միֆի, արտացոլմանը 1920–1930-ական թվականների հայ գրականության մեջ՝ համախորհրդային համատեքստում։ Հաջորդիվ ՎՊՀ հայոց լեզվի և գրականության ամբիոնի դոցենտ, բ.գ.թ. Վալերի Փիլոյանը ներկայացրեց Հրանտ Մաթևոսյանի ստեղծագործությունների՝ Լև Աննինսկու գնահատականների ուսումնասիրությունը։
Լիագումար նիստի թեմատիկ ընդգրկումը ցույց տվեց, թե ինչպես կարող են գրականության պատմության, առասպելաբանական մտածողության, մշակութային հիշողության և գրական քննադատության տարբեր հարցադրումները հատվել մեկ գիտական հարթակում՝ բացահայտելով ազգային գրականությունների ուսումնասիրության նոր դիտանկյուններ։
Գիտաժողովի աշխատանքները շարունակվեցին մասնագիտական բաժանմունքներում՝ ընդգրկելով լեզվաբանության, գրականագիտության, լրագրության, բանագիտության, մանկավարժության, ինչպես նաև լեզվի և գրականության դասավանդման մեթոդիկայի հիմնախնդիրները։
Քննարկումների թեմատիկ բազմազանությունն արտացոլում էր ժամանակակից հումանիտար գիտությունների միջգիտակարգային բնույթը։ Տարբեր հետազոտական ուղղությունների համադրումը հնարավորություն ընձեռեց լեզուն և գրականությունը դիտարկելու ոչ միայն որպես առանձին ուսումնասիրության առարկաներ, այլև որպես մշակութային հիշողության պահպանման, ազգային ինքնության արտահայտման և միջմշակութային հաղորդակցության կարևոր միջոցներ։
Գիտաժողովի առանձնահատկություններից էր նաև տեսական հետազոտությունների և կրթության փոխառնչությունը։ Գրականագիտական ու լեզվաբանական հարցադրումների կողքին իրենց տեղն ունեին դասավանդման մեթոդիկային և մանկավարժությանը վերաբերող ուսումնասիրությունները՝ ընդգծելով գիտական նոր մոտեցումների և կրթական գործընթացի միջև կապի կարևորությունը։
Ամփոփելով գիտաժողովի աշխատանքները՝ ՎՊՀ ռեկտոր Արմեն Ծատուրյանը շնորհակալություն հայտնեց մասնակիցներին՝ կարևորելով գիտական գաղափարների փոխանակումն ու նման նախաձեռնությունների նշանակությունը համալսարանի ակադեմիական կյանքում։ Գիտաժողովի ավարտին զեկուցողներին հանձնվեցին մասնակցության հավաստագրեր։
VIII միջազգային գիտաժողովը վերահաստատեց գիտական երկխոսության շարունակականության կարևորությունը՝ մեկ հարկի տակ համախմբելով տարբեր երկրների և գիտական ուղղությունների ներկայացուցիչներին լեզվի, գրականության ու մշակույթի շուրջ։
