Վանաձորի պետական համալսարանը մասնակցում է բարձր տեխնոլոգիական արդյունաբերության նախարարության կողմից կազմակերպված Ուսանողական երկրորդ հաքաթոնին
2025թ․ օգոստոսի 26-ին Ծաղկաձորում մեկնարկեց ՀՀ բարձր տեխնոլոգիական արդյունաբերության նախարարության կողմից կազմակերպված Ուսանողական երկրորդ հաքաթոնը՝ «Մասնագետների պատրաստման բուհ-մասնավոր հատված համագործակցություն» ծրագրի շրջանակում։
Բարձր տեխնոլոգիական արդյունաբերության նախարար Մխիթար Հայրապետյանը և նախարարի տեղակալ Ռուբեն Սիմոնյանը ողջունեցին և հաջողություն մաղթեցին ուսանողներին։
Միջոցառման պաշտոնական բացման արարողությանը ելույթ ունեցավ նաև Վանաձորի պետական համալսարանի ռեկտորի ժամանակավոր պաշտոնակատար, տ.գ.դ., պրոֆեսոր Ռուստամ Սահակյանը։
Եռօրյա ծրագիրը անցկացվում է օգոստոսի 26-29-ը ընկած ժամանակահատվածում ՝ Հայաստանի տարբեր կրթական հաստատությունների ԲՏՃՄ ուղղվածությամբ սովորող շուրջ 100 ուսանողի մասնակցությամբ։
Վանաձորի պետական համալսարանի թիմի կազմում են ՝ Մարիետա Սահակյանը (Ինֆորմատիկա, 2-րդ կուրս) , Արման Սաղաթելյանը (Ինֆորմատիկա, 2-րդ կուրս), Անի Թամարյանը (Ինֆորմատիկա,4-րդ կուրս), Մանե Շախկյանը (Ակտուարական և ֆինանսական մաթեմատիկա, 4-րդ կուրս), Անդրե Բալջյանը (Կենսաբանություն,2-րդկուրս)։
Թիմերը մրցում են առաջադրված խնդիրների իրենց առաջարկած տեխնոլոգիական լուծումներով։ Հաղթող կճանաչվեն լավագույն լուծումներ առաջարկած 3 թիմերը, որոնց կտրվեն դրամական մրցանակներ։
Հաքաթոնի ընթացքում նախատեսված են նաև սեմինարներ և մասնագիտական քննարկումներ բարձր տեխնոլոգիական արդյունաբերության նախարարության, բիզնեսի, գիտակրթական կազմակերպությունների ներկայացուցիչների մասնակցությամբ, որոնք հնարավորություն կտան ուսանողներին շփվելու ոլորտի փորձագետների հետ, ծանոթանալու նորագույն տեխնոլոգիական միտումներին և ստանալու գործնական խորհուրդներ։
Վանաձորի պետական համալսարանը մասնակիցներին մաղթում է թիմային արդյունավետ ու համակարգված աշխատանք, առաջխաղացում և ստեղծագործ մոտեցում՝ իրենց գաղափարները կյանքի կոչելու համար։
