Կայացավ «Մասնագիտությունների տոնավաճառ» միջոցառումը
«Վանաձորի Հ․ Թումանյանի անվան պետական համալսարան» հիմնադրամում նոյեմբերի 15-ին կայացավ արդեն ավանդական դարձած «Մասնագիտությունների տոնավաճառ» միջոցառումը:
Համալսարանի գիտահետազոտական աշխատանքների, նորարարությունների և համագործակցության բաժնի կողմից կազմակերպված «Մասնագիտությունների տոնավաճառ» միջոցառումը հերթական անգամ «Վանաձորի Հ․ Թումանյանի անվան պետական համալսարան» հիմնադրամի հարկի ներքո համախմբեց ոչ միայն բուհի բոլոր մասնագիտությունները ներկայացնող դասախոսներին և ուսանողներին, այլև Լոռու մարզի տարբեր բնակավայրերի հարյուրավոր դպրոցականների: Այս միջոցառումը միտված է հերթական անգամ նպաստելու բուհ-դպրոց կապերի ամրապնդմանը, աշակերտների մասնագիտական կողմնորոշմանը։
Ողջույնի խոսքով հանդես եկավ համալսարանի ռեկտոր տեխնիկական գիտությունների դոկտոր, պրոֆեսոր Ռուստամ Սահակյանը: Դպրոցականներին ողջունեցին նաև հասարակական գիտությունների ֆակուլտետի դեկան Հրայր Պապոյանը և հայոց լեզվի և գրականության ամբիոնի վարիչ Հերմինե Բաբուռյանը։
Ներկաներին իր գեղեցիկ կատարմամբ ողջունեց նաև Աննա Ստեփանյանը։
Յուրաքանչյուր մասնագիտություն ներկայացված էր առանձին տաղավարով, ցուցադրական նյութերով, պարագաններով։
Աշակերտները շրջեցին տաղավարներով, ծանոթացան համալսարանի մասնագիտություններին և ընդունելության պայմաններին:
