Մասնագիտական վերապատրաստում՝ ՎՊՀ-ում
«Վանաձորի Հ. Թումանյանի անվան պետական համալսարան» հիմնադրամում մանկավարժության և հոգեբանության ամբիոնի պրոֆեսորադասախոսական կազմի մասնագիտական որակավորման բարձրացման նպատակով 2025 թվականի դեկտեմբերի 11-ից 2026 թվականի փետրվարի 13-ը ներառյալ կազմակերպվել է «Արտտեխնոլոգիաները որպես այլընտրանքային միջոցներ դասագործընթացում» 18-ժամյա դասընթաց՝ Երևանի պետական համալսարանի «Մանկավարժության և կրթության զարգացման կենտրոնի» մանկավարժության ամբիոնի հետ համագործակցությամբ։ Դասընթացը վարել է մ․գ․թ․, դոցենտ Լուսինե Հայրապետյանը, որն այդ ուղղությամբ վերապատրաստվել է բազմաթիվ եվրոպական երկրներում։
Մարտի 9-ին վկայականները հանձնվեցին հատուկ արարողությամբ՝ երաժշտական կատարումներով, մասնագիտական քննարկումներով՝ ընդգծելով նպատակադրման և վերջնարդյունքների միջև կապը։ Ելույթ ունեցան համալսարանի ռեկտոր, մ.գ.դ. Արմեն Ծատուրյանը, կրթական բարեփոխումների, շարունակական կրթության և կարիերայի կենտրոնի ղեկավար Լիլիթ Փարսադանյանը, մանկավարժության և հոգեբանության ամբիոնի վարիչ, մ․գ․թ․, դոցենտ Լիլիթ Բաղդասարյանը, ամբիոնի մ․գ․թ․, դոցենտ Սեդա Բեժանյանը։
