Գիտությունն ու սպորտը զուգահեռ են քայլում Գոռ Հարությունյանի կյանքում
Գիտությունն ու սպորտը զուգահեռ են քայլում Գոռ Հարությունյանի կյանքում
Վանաձորի Հ. Թումանյանի անվան պետական համալսարանի ռեկտոր Ռուստամ Սահակյանն այսօր հպարտությամբ ընդունեց «Պատմություն» մասնագիտության 3-րդ կուրսի ուսանող Գոռ Հարությունյանին, ով Սերբիայի Նովի Սադ քաղաքում օրերս կայացած Սամբոյի Եվրոպայի առաջնությունում 88 կգ քաշային կարգում նվաճել է Եվրոպայի չեմպիոնի տիտղոսը:
Ռ. Սահակյանն ուրախությամբ արձանագրեց, որ բացի մարզական փայլուն կարիերան, Գոռ Հարությունյանը նաև բարձրագույն կրթություն է ստանում՝ խորապես ծանոթանալով հայոց պատմության ակունքներին: Ռեկտորը խոստացավ, որ բուհը կանի հնարավորինը, որպեսզի Գոռի թե՛ մասնագիտական, և թե՛ մարզական հաջողությունները միմյանց զուգահեռ առաջ գնան:
Վանաձոր քաղաքի սամբո ըմբշամարտի ֆեդերացիայի նախագահ Զավեն Էվոյանի բնութագրմամբ՝ «Գոռը օժտված է կամային բարձր որակներով, երբեք ոչնչից չի ընկճվում, մարզիչի հետ անում է ամեն ինչ՝ իր հմտությունները, կարողությունները բարձր մակարդակի հասցնելու համար»:
Չեմպիոնն ինքը հաղթանակի իր բանաձևն ունի. «գոտեմարտ մտնելուց առաջ կարևորը լավ տրամադրվածությունն է, վստահությունը սեփական ուժերին և իհարկե հավատը առ Աստված»:
Նշենք, որ Գոռ Հարությունյանի մարզիչը սամբո ըմբշամարտի աշխարհի հնգակի չեմպիոն, ՀՀ վաստակավոր մարզիչ Գագիկ Ղազարյանն է:
Առաջիկայում ՀՀ մայրաքաղաք Երևանում կկայանա սամբո ըմբշամարտի աշխարհի առաջնությունը, որտեղ ևս մասնակցություն կունենա Գոռ Հարությունյանը: Ուժ ու կորով ենք մաղթում մեր ուսանողին՝ կրկին հաղթանակ տոնելու ակնկալիքով:
