Գիտական սեմինարներ քիմիայի և կենսաբանության ամբիոնում
Դեկտեմբերի 10-ին և 12-ին Վանաձորի պետական համալսարանի քիմիայի և կենսաբանության ամբիոնում տեղի են ունեցել գիտական սեմինարներ։
Քիմիայի և կենսաբանության ամբիոնի դոցենտ, կենսաբանական գիտությունների թեկնածու Շուշան Քառյանը ներկայացրել է «Կենսաբանական տարիք» թեմայով զեկույց, որի ընթացքում անդրադարձ է կատարել կենսաբանական և քրոնոլոգիական տարիքների առանձնահատկություններին ու տարբերություններին, որոշել կենսաբանական տարիքը տարբեր մասնագիտություններ ունեցող 45-65 տարիքային խմբի շրջանում։ Ինչպես նաև ներկայացրել է կենսաբանական տարիքի ժառանգական նախադրյալներն ու շրջակա միջավայրի գործոնների ազդեցությունը։
Կենսաբանական գիտությունների թեկնածու, դոցենտ Հասմիկ Մխիթարյանը ներկայացրել է «Լոռու մարզի ռելիկտային դենդրոցենոզների ուսումնասիրումը» թեման՝ անդրադառնալով Լոռու մարզի մերձալպյան գոտու ռելիկտային դենդրոցենոզների ուսումնասիրմանը և 1990-ականների զանգվածային անտառահատումների ազդեցությանը անտառածածկ տարածքների կրճատման և տեսակային կազմի փոփոխության վրա։ Ներկայացրել է հետազոտության նպատակն ու խնդիրները, մասնավորապես, մերձալպյան գոտու դենդրոբազմազանության, ռելիկտային դենդրոցենոզների տեսակային կազմի, տարածման և վերականգնման օրինաչափությունների ուսումնասիրությունը, ինչպես նաև դրանց պահպանության ու վերարտադրության ուղիների մշակումը։
Հ․ Մխիթարյանը առանձնակի ուշադրություն է դարձրել Լիտվինովի կեչուն և կովկասյան մրտավարդին՝ նկարագրելով դրանց առանձնահատկությունները, տարածման պայմանները և մարդածին ճնշման նվազման հետևանքով մրտավարդի տարածման ընդարձակումը։
Ներկայացված զեկույցները մեծ հետաքրքրություն առաջացրին՝ նպաստելով մասնագիտական քննարկումների ծավալմանը և գիտական մտքերի փոխանակմանը։
