Վանաձորի պետական համալսարանի դասախոսների շարժունությունը արտասահմանյան համալսարաններում

 Erasmus+ KA171 ծրագրի շրջանակներում միջբուհական համագործակցության արդյունքում Վանաձորի պետական համալսարանի օտար լեզուների և գրականության ամբիոնի դասախոսներ Մարիաննա Էնֆենջյանը և Գայանե Մատինյանը  հնարավորություն ունեցան  2025թ․ մայիսի 5-ից  9-ը դասավանդելու  Իսպանիայի Գրանադայի և Լեհաստանի Ադամ Միցկևիչի  անվան  համալսարաններում։

Վանաձորի պետական համալսարանի օտար լեզուների և գրականության ամբիոնի դասախոս Գայանե Մատինյանը 8 ժամ դասավանդել է Իսպանիայի  Գրանադայի համալսարանի  փիլիսոփայության և գրականության ֆակուլտետում, որտեղ դասախոսություններ է ակցկացրել՝ «Ներկապակցումը և հարակցումը գրավոր խոսքում»  թեմայով։

Ֆակուլտետի պրոֆեսորների հետ հանդիպումների  ընթացքում քննարկել է հետագա համագործակցությանը վերաբերող կարևոր հարցեր։ Գայանե Մատինյանը հանդիպել է  Գրանադայի համալսարանում սովորող հայ ուսանողներին, այդ թվում՝ մեր համալսարանի «Անգլերեն լեզու և գրականություն»   մասնագիտության երրորդ կուրսի ուսանողուհի  Էլեն Ստեփանյանին։ Մատինյանը  շրջել է  համալսարանի մասնաշենքերում և գրադարանում, այցելել միջազգային հարաբերությունների գրասենյակ, որտեղ ծանոթացել է պրոֆեսոր Էսթեր Սանտիագոյի հետ և քննարկել այցելության նպատակներն ու արդյունքները։

 Վանաձորի պետական համալսարանի օտար լեզուների և գրականության ամբիոնի դասախոս Մարիաննա Էնֆենջյանը 4 ժամ դասավանդել է  Պոզնանի Ադամ Միցկևիչի անվան համալսարանի լեհական և դասական բանասիրության ֆակուլտետում։ Դասավանդել է  հիմնականում միջազգային ուսանողների՝  Չինաստանից, Վիետնամից, Պորտուգալիայից և այլ երկրներից։

  Դասախոսությունները նվիրված էին երկու հիմնական թեմայի՝ «Արհեստական բանականության վրա հիմնված լեզուների ուսուցում․ անգլերենի՝ որպես օտար լեզվի (EFL) կրթության ապագան» և «Մշակութային փոխանակում լեզվի միջոցով․ անգլերենի` որպես օտար լեզվի (EFL) դերը համայնքները միավորելու գործում»: Դասընթացների ընթացքում ուսանողները ծանոթացել են  նորարարական մոտեցումներին՝ օգտագործելով արհեստական բանականության գործիքներ և միջմշակութային հաղորդակցման մեթոդներ։

 Վանաձորի պետական համալսարանի  էկոնոմիկայի, իրավունքի և կառավարման ամբիոնի դասախոս, ի․գ․թ․ դոցենտ Քրիստինե Ղազարյանը մայիսի 12-ից 16-ը մեկնել է Իսպանիայի Մալագայի համալսարան՝ 8 ժամ դասավանդելու իրավաբանության ֆակուլտետում։

Դասախոսության թեմաները նախապես համաձայնեցված են եղել «Կոլեկտիվ աշխատանքային հարաբերություններ» դասընթացը վարող դասախոսի՝ Լուսիա Արագուեզի հետ։ Դասախոսության թեմաներն ընտրվել էին դասավանդվող դասընթացի թեմատիկայից.

1. Սոցիալական գործընկերություն
2. Կոլեկտիվ աշխատանքային հարաբերություններ
3. Կոլեկտիվ աշխատանքային պայմանագիր: Կոլեկտիվ աշխատանքային վեճեր

Կոլեկտիվ աշխատանքային վեճերի լուծման ընթացակարգը: Գործադուլը որպես կոլեկտիվ աշխատանքային վեճի լուծման միջոց:

• Հավասարակշռությունն աշխատանքի և կյանքի միջև: Ճկուն աշխատաժամանակի իրավակարգավորման առանձնահատկություններն աշխարհում և դրա տեսակները:

Դասախոսությունն ամփոփվել է Հայաստանի Հանրապետության և Վանաձորի պետական համալսարանի վերաբերյալ ցուցադրության ներկայացմամբ, ինչի արդյունքում ուսանողների և հատկապես դասավանդող դասախոսի մոտ ցանկություն առաջացավ փոխանակման ծրագրով այցելելու Հայաստան և հատկապես Վանաձորի պետական համալսարան:

Դասավանդումից բացի, հանդիպում էր կազմակերպվել Միջազգային հարաբերությունների և կապերի բաժնի ղեկավարի և Իրավաբանության ֆակուլտետի դեկանի հետ։

Ինչպես նշում են շարժունությանը մասնակցած դասախոսները՝  այս փորձառությունը նպաստեց ոչ  միայն  մասնագիտական զարգացմանը, այլ նաև հնարավորություն տվեց համատեղելի  մոտեցումների փոխանակման և ապագա  համագործակցության։