«Բիայնա» երգչախմբի համերգը
2025 թ․ դեկտեմբերի 16-ին Վանաձորի պետական համալսարանի դահլիճում կայացավ ՎՊՀ «Բիայնա» երգչախմբի համերգը։
Միջոցառմանը ներկա էին համալսարանի ռեկտորը, պրոֆեսորադասախոսական անձնակազմը, հոգևոր դասի ներկայացուցիչներ, աշխատակիցներ և ուսանողներ։ Համերգի ընթացքում հնչեցին Կոմիտասի, Խաչատուր Ավետիսյանի, Կարա Մուրզայի, Առնո Բաբաջանյանի, Էդուարդ Կզարթմյանի, Թաթուլ Ալթունյանի, Ջեյմս Գյոզալյանի ստեղծագործությունները՝ արվեստի և սպորտի ամբիոնի դոցենտ Կարինե Երիցյանի նվագակցությամբ: Հնչեց նաև բանասիրական գիտությունների դոկտոր, պրոֆեսոր Գուրգեն Խաչատրյանի «Կարոտի երգ» ստեղծագործությունը, որը երգչախմբի համար բազմաձայնել է «Բիայնայի» գեղարվեստական ղեկավար Սերգեյ Հարությունյանը, իսկ դաշնամուրային նվագակցությունը հեղինակել է ՎՊՀ նախկին շրջանավարտ, երգչախմբի նախկին երգչուհի Անահիտ Ստեփանյանը։
«Բիայնա» երգչախմբի կատարումները ևս մեկ անգամ վկայում են, որ ազգային երգարվեստը ոչ միայն պահպանում է իր կենսունակությունը, այլև շարունակաբար հարստանում է նոր շնչով ու ստեղծագործական որոնումներով: Երգչախումբն իր գործունեությամբ հավատարիմ է հայ մշակույթի պահպանման վեհ առաքելությանը։ Այն ներկայացնում է հայկական մաքուր ու ինքնատիպ երգարվեստը՝ նրա ավանդական շունչը փոխանցելով նոր սերունդներին։
