Վանաձորի պետական համալսարանի ռեկտորի աշխատանքային այցը Գերմանիայի Դարմշտադտի կիրառական գիտությունների համալսարան
2025 թ․ դեկտեմբերի 1-5-ը Վանաձորի Հ․ Թումանյանի անվան պետական համալսարանի ռեկտոր Արմեն Ծատուրյանը աշխատանքային այցով գտնվել է Գերմանիայի Դարմշտադտի կիրառական գիտությունների համալսարանում՝ DAAD նախագծի շրջանակներում։
Այցի ընթացքում Արմեն Ծատուրյանը հանդիպումներ է ունեցել Դարմշտադտի համալսարանի ղեկավար կազմի և միջազգային համագործակցության բաժնի ներկայացուցիչների հետ։ Քննարկումների առանցքում եղել են երկու համալսարանների միջև համագործակցության զարգացման և նոր ծրագրերի իրականացման հնարավորությունները՝ հատկապես ուսանողների և դասախոսների ակադեմիական շարժունության, համատեղ կրթական և գիտական ծրագրերի շրջանակներում։
Կողմերը, մասնավորապես, անդրադարձել են 2025 թվականի ամռանը Վանաձորի պետական համալսարանի ուսանողների մասնակցությանը Դարմշտադտի համալսարանում կազմակերպված ամառային դպրոցին՝ գնահատելով ծրագրի արդյունավետությունը և ձեռք բերած դրական փորձը։ Միջբուհական համագործակցությունն ամրապնդելու նպատակով՝ միաժամանակ ներկայացվել է Վանաձորի պետական համալսարանի նախաձեռնությունը 2026 թվականի ամռանը Վանաձորում կազմակերպել միջազգային ամառային գիտական դպրոց, որի շրջանակում մեր համալսարանը կհյուրընկալի Գերմանիայի Դարմշտադտի, Ռումինիայի Կլուժ-Նապոկայի և Ուկրաինայի Ուժգորոդի պետական համալսարանների ուսանողներին ու ներկայացուցիչներին։