Վանաձորի պետական համալսարանում նշվեց ուսանողության միջազգային օրը
2025 թ․ նոյեմբերի 17-ին Վանաձորի Հ․ Թումանյանի անվան պետական համալսարանում նշվեց Ուսանողության միջազգային օրը։
Վաղ առավոտից համալսարանում ուսանողներին դիմավորում էին մշակույթի կենտրոնի և ուսանողական խորհրդի անդամները, շնորհավորում և նվիրում խորհրդանշական նվերներ ու քաղցրավենիք՝ փոխանցելով ուրախ ու տոնական տրամադրություն։
Միջոցառման շրջանակներում իրականացվեց նաև վիճակահանություն և յուրաքանչյուր ֆակուլտետից մեկական կուրս հնարավորություն ստացավ մեկօրյա հանգիստ անցկացնելու համալսարանի հանգրվանում։
Տոնական միջոցառումը շարունակվեց համալսարանի դահլիճում։ Մեկնարկն ազդարարվեց Հայաստանի Հանրապետության և Վանաձորի պետական համալսարանի օրհներգերով։
Ուսանողության տոնի կապակցությամբ շնորհավորական ուղերձներով ելույթ ունեցան Վանաձորի պետական համալսարանի ռեկտորի ժամանակավոր պաշտոնակատար, մանկավարժական գիտությունների դոկտոր, Հայաստանի Հանրապետության վաստակավոր մանկավարժ Արմեն Ծատուրյանը և հումանիտար գիտությունների ֆակուլտետի դեկան, պատմական գիտությունների թեկնածու, դոցենտ Մարիյա Բրուտյանը։
Մեր տաղանդավոր երաժիշտների ուղեկցությամբ ելույթ ունեցան համալսարանի «Ադելաս» պարային համույթը և կիթառի խմբակի շնորհալի ուսանողները։
Համալսարանի ակտիվ և ստեղծարար ուսանողները ցուցադրեցին փոքրիկ պատմություն-ներկայացում Վանաձորի պետական համալսարանի և արտասահմանյան համալսարանների ուսանողական կյանքի մասին՝ կիսվելով արտերկրյա ուսումնառության ընթացքում ստացած իրենց տպավորություններով։
Միջոցառման մրցութային հատվածում անցկացվեց «Գուշակիր մեղեդին» խաղ-մրցույթը։ Ուսանողների և դասախոսների միջև ընթացող պայքարն էլ ավելի աշխուժացրեց տոնական մթնոլորտը։
Օրը եզրափակվեց տոնական հյուրասիրությամբ։
Սիրելի՛ ուսանողներ, կրկին անգամ շնորհավորում ենք ձեզ և մաղթում՝ նորանոր նվաճումներ ու հաջողություններ ձեր բոլոր նախաձեռնություններում։
