Վանաձորի պետական համալսարանում DeSIRe նախագծի շրջանակներում հանդիսավոր բացվեց փափուկ հմտությունների լաբորատորիա
2025 թվականի մարտի 18-ին «Վանաձորի Հ. Թումանյանի անվան պետական համալսարան» հիմնադրամում տեղի ունեցավ Էրազմուս+ ՀԳ2 ԿԶԲԿ «Հայաստանի և Վրաստանի բուհերում 21-րդ դարի աշխատաշուկայի պահանջներին համահունչ փափուկ հմտությունների զարգացում» (DeSIRe) նախագծի շրջանակներում հիմնադրված փափուկ հմտությունների լաբորատորիայի պաշտոնական բացման արարողությունը։ Միջոցառմանը ներկա էին համալսարանի ռեկտորը, ուսումնական և գիտական աշխատանքների գծով պրոռեկտորները, գիտական և վարչական անձնակազմի ներկայացուցիչներ և ուսանողներ։
Համալսարանի ռեկտոր՝ պրոֆեսոր Ռուստամ Սահակյանը ողջունեց մասնակիցներին և ընդգծեց, որ փափուկ հմտությունների զարգացումը կարևոր է համապարփակ կրթություն ստանալու համար, որի շնորհիվ ուսանողներին կհաջողվի մրցունակ լինել անընդհատ փոփոխվող աշխատաշուկայում: Նա նշեց, որ զարգացող աշխատաշուկան ստեղծում է և՛ հնարավորություններ, և՛ մարտահրավերներ՝ անհրաժեշտ դարձնելով նոր հմտությունների զարգացումն ու կատարելագործումը։
Նախագծի համակարգող Լուսիկ Վարդանյանը կարևորեց DeSIRe նախագծի նպատակներն ու խնդիրները՝ բացատրելով, թե ինչպես է նորաբաց լաբորատորիան զգալիորեն նպաստելու ուսանողների կրթությանն ու նրանց փափուկ հմտությունների բարելավմանը: Նա ընդգծեց, որ նախագծի շրջանակներում մշակված մոդուլները և բաց զանգվածային դասընթացները (MOOCs) ուսանողներին կզինեն անհրաժեշտ հմտություններով` ժամանակակից աշխատաշուկայում առավել մրցունակ լինելու համար։ Վարդանյանը նաև ներկայացրեց նախագծում իրականացվող և առաջիկա գործողությունները՝ մասնավորապես մարտ և մայիս ամիսներին պլանավորված առցանց և առդեմ վերապատրաստումները:
Նախագծի համահամակարգող Գոհար Դոխոլյանը ներկայացրեց նախագծի շրջանակներում ձեռք բերված սարքավորումներն ու գրքերը: Նա ընդգծեց այս ռեսուրսների կարևորությունը՝ նշելով, որ դրանք էական դեր կխաղան արդյունավետ ուսուցմանն աջակցելու և ուսանողների կրթական գործընթացի բարելավման գործում: Դոխոլյանը նշեց նաև, որ փափուկ հմտությունների լաբորատորիան համահունչ է համալսարանի ավելի լայն կրթական նպատակներին՝ դաստիարակելով հասարակության մեջ բովանդակալից ներդրում ունենալու ունակ անհատների:
Նախագծի ֆինանսական մենեջեր Ղուկաս Ղուկասյանը ներկայացրեց DeSIRe նախագծի ֆինանսական որոշ հարցեր՝ ներկայացնելով, թե ինչպես են ձեռք բերվել լաբորատորիայի ռեսուրսները՝ ներառյալ արդի սարքավորումները և գրքերը: Նա ընդգծեց, որ այս արժեքավոր ներդրումը կնպաստի նախագծի երկարաժամկետ հաջողությանն ու կայունությանը` նպաստելով ուսանողների և աշխատակիցների ակադեմիական և մասնագիտական աճին:
Ելույթ ունեցավ նաև ուսումնական աշխատանքների գծով պրոռեկտոր Լուսինե Կոստանդյանը՝ ընդգծելով ուսանողների ճկուն հմտությունների զարգացման համար բարենպաստ միջավայրի ստեղծման կարևորությունը։ Նա կարևորեց փափուկ հմտությունները ակադեմիական ուսումնական ծրագրերում ընդգրկելու հարցը հատկապես այն առումով, երբ հարմարվողականությունը և քննադատական մտածողությունը կարևոր են աշխատաշուկայում հաջողության հասնելու համար:
Հումանիտար գիտությունների ֆակուլտետի դեկան Մարիա Բրուտյանը կարևորեց լաբորատորիայի առկայությունը, ինչը կնպաստի ուսանողների մասնագիտական կյանքի համար անհրաժեշտ գործնական հմտությունների զարգացմանը, և ընդգծեց ֆակուլտետի` նախագծի անդամների գործունեությանն աջակցելու պատրաստակամության մասին: Նա տեղեկացրեց, որ DeSIRe նախագծի կողմից առաջարկվող միջգիտակարգային մոտեցումը օգուտ կբերի թե՛ ուսանողներին, թե՛ դասախոսներին ժամանակակից աշխատաշուկայում հաջողելու իմաստով:
Համալսարանի որակի ապահովման կենտրոնի ղեկավար Աննա Խաչատրյանը փոխանցեց բարձրագույն կրթության ոլորտում համաշխարհային համագործակցության աճող կարևորության վերաբերյալ իր մտքերը։ Նա կարևոր համարեց DeSIRe նախագծի նշանակությունը միջազգային գործընկերությունների խթանման և ուսանողներին անհրաժեշտ գործիքներով ապահովելու անհրաժեշտությունն առավել փոխկապակցված աշխարհում առաջադիմելու համար: Նա նաև ընդգծեց համալսարանի դերը նման նախագծերի միջոցով նորարարությունը խթանելու գործում:
Նախագծի անդամ Վանանե Միրզոյանն իր խոսքում ավելի հոգեբանական մոտեցում ցուցաբերեց՝ անդրադառնալով փափուկ հմտությունների և հոգեբանության միջև առկա կապին: Ըստ Վ. Միրզոյանի` փափուկ հմտությունները ոչ միայն արդյունավետ գործիքներ են, այլև նրանք նպաստում են քննադատական մտածողության և հարմարվողականության, ինչպես նաև անձնական աճի զարգացմանը: Նա հայտնեց, թե ինչպես է այս հմտությունների զարգացումը բարձրացնում ոչ միայն մասնագիտական հաջողությունը, այլև օգնում է անհատներին ընթանալու իրենց անձնական ճանապարհին դեպի ինքնագիտակցություն և հանրային պատասխանատվություն:
Փափուկ հմտությունների լաբորատորիայի բացումը կարևոր ձեռքբերում է մեր համալսարանի համար՝ ուսանողներին ժամանակակից աշխատաշուկային անհրաժեշտ հմտություններով զինելու գործում:
