Հուշ-ցերեկույթ՝ նվիրված ֆրանսահայ նշանավոր երգիչ Շառլ Ազնավուրին
Հուշ-ցերեկույթ՝ նվիրված ֆրանսահայ նշանավոր երգիչ Շառլ Ազնավուրին
Վանաձորի Հ. Թումանյանի անվան պետական համալսարանում Ֆրանկոֆոնիայի միջազգային օրվան նվիրված միջոցառումների շարքը ամբողջացրեց ֆրանսահայ նշանավոր երգիչ, երգահան, գրող, կինոդերասան և հասարակական գործիչ Շառլ Ազնավուրին նվիրված ցերեկույթը:
Միջոցառումը նախաձեռնեց և իրականացրեց համալսարանի մշակույթի կենտրոնի ղեկավար Մարիամ Լոռեցյանը: Ինչպես հայերենով, այնպես էլ ֆրանսերենով ներկայացվեց Շառլ Ազնավուրի կենսագրությունը: Ավելի քան ութ հարյուր երգի հեղինակի ստեղծագործությունները նույնպես ներկայացվեցին երկլեզու: Ազնավուրի ստեղծագործությունները կատարեցին համալսարանի ոչ միայն այժմյան ուսանողները, այլև շրջանավարտները:
Միջոցառումը գեղարվեստական համարներով զարդարեցին համալսարանի «Ադելաս» պարային համույթը և ջութակահար Վիկտորյա Շահինյանը:
1998 թ.-ին “Թայմս” ամսագրի և CNN-ի անցկացրած հարցման արդյունքում Ազնավուրը ճանաչվել է «Դարի արվեստագետ»՝ 49 հազար ձայնով։ Նա արժանացել է Հայաստանի և Ֆրանսիայի բարձրագույն պետական պարգևներին:
Երաժշտի` մինչ օրս վաճառված ձայնասկավառակների թիվն ամբողջ աշխարհում շուրջ 100 միլիոն է:
Ազնավուրի երգացանկում առանձնահատուկ տեղ ունի նրա՝ մորը նվիրված երգացանկը: Այդ գեղեցիկ երգերից մեկը՝ «La mamma»-ն, կատարեց համալսարանի շրջանավարտ Զարուհի Խաչատրյանը:
Ազնավուրը հպարտանում էր իր հայկական ծագմամբ, մշտապես սատար էր կանգնում Հայաստանին։ Հայկական թեմաներով են նրա «Քեզ համար, Հայաստան», «Նրանք ընկան», «Ինքնակենսագրություն», «Քնքուշ Հայաստան» երգերը։ Ազնավուրյան հուշ-ցերեկույթը եզրափակվեց «Քեզ համար, Հայաստան» երգով:
