Ավարտվեց «Հնամյա և նորաշունչ հայոց լեզուն» խորագրով դասընթացը

 Ավարտվեց «Հնամյա և նորաշունչ հայոց լեզուն» խորագրով դասընթացը

«Վանաձորի Հ. Թումանյանի անվան պետական համալսարան»-ում սեպտեմբերի 12-ին մեկնարկած հայագիտական խտացված դասընթացը` «Հնամյա և նորաշունչ հայոց լեզուն» վերնագրով, ավարտվեց:

Հնգօրյա դասընթացը վարում էր բ.գ.թ., Լեյդենի համալսարանի գիտաշխատող Հրաչ Մարտիրոսյանը: Մասնակիցների թվում ուսանողներ, շրջանավարտներ և պրոֆեսորադասախոսական անձնակազմի ներկայացուցիչներ էին: Դասընթացավարը գոհ է խմբի ակտիվ մասնակցությունից, կոլեկտիվ աշխատանքից, գործնական աշխատանքների կատարումից, ինչը միտված էր մատուցված նյութն ավելի ամրապնդելուն:

Յուրաքանչյուր դասի տևողությունը 4-5 ժամ էր: Դասընթացը կազմակերպվում էր ինտերակտիվ մեթոդներով՝ ժամանակակից տեխնոլոգիաների ներդրմամբ. հիմնատեքստն ուղեկցվում էր  տեսողական նյութերով: Դասախոսության հետ մեկտեղ՝ կատարվել են նաև գործնական աշխատանքներ և խմբային քննարկումներ:

Դասընթացի նպատակն էր հանրամատչելի ձևով ներկայացնել հայոց լեզվի, մշակույթի ու դիցարանի ծագման և պատմական զարգացման ընդհանուր նկարագիրը՝ հնդեվրոպական նախալեզվի ակունքներից մինչև գրաբար ու բարբառներ (հատկապես՝ Արցախի ու Սյունիքի տարածաշրջանների), հայերենագիտությանն առնչվող այլ թեմաներ: «Հայերենագիտության հանրայնացումը շատ կարևոր է առհասարակ` գիտական սխաալներից զերծ մնալու ճանապարհին: Այդ առումով այս դասընթացը մի փորձ էր»,-նշում է բ.գ.թ. Հրաչ Մարտիրոսյանը:

«Հնամյա և նորաշունչ հայոց լեզուն» խորագրով դասընթացի մասնակիցները ստացան հավաստագրեր՝ ակտիվ մասնակցության համար։